آنة يا حسين العزيزة سكنة يا صيوان داري     أعتذر منك يا بوية و ادري مقبول اعتذاري

بسبب لن حشمت عمي من العطش و بقلبي ناري     و راح عمي و انتظرته حتى مليت انتظاري

مليت ظليت انطر و أحسب لحظات     و تنوح هالروح تقدر تصبر هيهات
دمعي يهمي      جفني مدمي      وينه عمي      ليش تأخر عباس

انتظر و القلب يخفق مثل جنحان اليمامة      قلت ليش اطلبت منه الماي و أخذتني الندامة
هم صدق يرجع لي عمي برايته و جوده و حسامه      ريت لا يروى دليلي بس يرد لي بالسلامة
یاريت لا جيت و لا منه طلبت الماي     ونيت تمنيت لا تبرد نار حشاي
هذا هضمي      موتي حتمي      وينه عمي     ليش تأخر عباس

هاك اخذ مرسال مني و للقمر روح و تعنه     انشد عليه الشريعة بلكي تسمع خبر عنه
و لوَن بابوية لقيته عن لساني اعتذر منه      قله يا عباس ارجع ما تريد الماي سكنة
ترجيت و ادعيت يا ريتك حي تلقاه      موجود و ردود ترجع للخيمة وياه
            هو حلمي     هو عزمي      وينه عمي       ليش تأخر عباس

نذر راح انذر يا بوية لو يرد عباس الية      انذر عيوني و دليلي فوق رمل الغاضرية
و ثاني رجوة لو شفتكم للخيم جيتوا سوية     افرح و اشهق مسرة و اصعد لهام الثرية
لو عاد ينعاد عمري و كل همي يروح       لو مات هيهات من بعده تعيش الروح
   يبقى سهمي      قلبي مرمي     وينه عمي      ليش تأخر عباس