تمشي اليك توسلا خطواتي     و اعدها اذا انها حسناتي
و ودت لو ان الطريق لكربلا     من مولدي سيرا لحين مماتي
لأنادي في يوم الحساب تفاخرا     أفنيت في حب الحسين حياتي

خذ ولائي كربلائي     لو تعبن الرجلين
أوصل زحف لحسين
خذ ولائي كربلائي

مجنون وحبك علمني     ما ساوم و اخضع هيهات
هيهات الذلة اتعاشرني     و المات ابدربك ما مات
جم طاغي الحاول يمنعني     و ارفع رايات الثارت
لبيك الحد قطع المنحر     صوت الدم يصنع ثورات

في دمائي يارجائي     أثبيت أصول الدين
أوصل زحف لحسين
خذ ولائي كربلائي

شايل يوم الطف بعيوني     و بجفني أتنام الأحزان
نتعلم من هذا المنبر     نصنع ثورة علی الطغيان
ملتزمين بهاي الخدمة     بس هالخدمة اتعلي الشان
وحسين اليرفع خدامه     و يخلي الخادم سلطان

في حياتي أو مماتي     وي لهفة الماشين
أوصل زحف لحسين
خذ ولائي كربلائي

مولايه ابخدمة زوارك     صارت محسودة الخدام
كل ضنة الظالم يرهبني     من صدر حكم الاعدام
أتلقى الزاير بدموعي     هاك أرموشي اتغطى و نام
أتشرف بتراب أجدامك     و صفه اترابك للآلام

قطع نحري زاد فخري     وينه المنعني وين
أوصل زحف لحسين
خذ ولائي كربلائي

و بدرب الطف لاحت راية     رفت باكثر من تصريح
تهتف لبيك او ثار الله     وين اتميل يهب الريح
راية و كف حيدر لازمها     من اطيح القاع ايطيح
اصغي و اسمع صوت الراية     وينك ها يالمهدي تصيح

شبل حيدر حين يظهر     و ينادي بالضلعين
أوصل زحف لحسين
خذ ولائي كربلائي

مشاية اتقصدك انصارك     عالعاده و رغم الأخطار
كل قطرة السالت من نحرك     انشودة ابدرب الأحرار
كل دمعة ابدربك محسوبة      و ابكل خطوة اتصيح الثار
يتمنى العباس اچفوفه     من يسمع صوت الزوار

لاح ضيفي أين كفي     و ينادي دمع العين
أوصل زحف لحسين
خذ ولائي كربلائي

من ابعيد القبرك أمشي     و اسبح من دمعي المسفوح
واسمع صوت ايجر ابروحي     و كف مقطوع أهناك ايلوح
يستقبل زينب و العيلة     و الموعد يم المذبوح
ونواسي السجاد ابصبره     ونداوي القلب المجروح

صاح قلبي أي و ربي     لو بلعمر يومين
أوصل زحف لحسين
خذ ولائي كربلائي